董建華（1937年7月7日—）依家嘅政協第十屆全國委員會副主席，同時亦都係第一任同埋第二任（第二任任期未完就請辭）香港特別行政區嘅行政長官，亦即係香港主權交畀中華人民共和國之後嘅第一位行政首長，簡稱特首。佢1937年7月7日（同日發生蘆溝橋事變）喺上海出世，1947年成家人搬咗去香港落腳。1960年嗰陣佢喺英國利物浦大學攞到海事工程理學士學位，之後接手家族生意「東方海外（國際）有限公司」（香港交易所上市編號0316），到做咗特首之後先退出業務。
到咗1990年代初嗰陣時，佢開始涉足政界事務。佢得當時香港總督（港督）彭定康（Christopher Pattern）請入香港行政局。喺得到江澤民嘅支持之後，八百人選舉委員會選咗佢做特區嘅首任特首。但係响佢第一屆特首嘅五年任期（1997年至2002年）內，香港出現經濟（例如1997年亞洲金融風暴、2000年科網股泡沫爆破）、公共衛生（禽流感）同政治危機，搞到民怨沸騰。而佢更被人話用人唯親（好似任用路祥安，搞出香港大學民調風波），亂出政策（好似八萬五房屋政策）。但係，就算係咁，响佢第一屆特首任期結束之際，進行第二屆特首嘅選舉嗰陣，因為冇第二啲候選人攞到足夠選舉委員嘅提名，董建華結果喺呢次選舉入便，可以自動連任。
之後，聽講董建華順從北京中央政府意思，想以強硬嘅方式通過基本法第23條嘅立法草案。嗰條草案將好多香港同其他世界先進地區一路都有嘅自由同埋人權，睇做叛國、分裂國家、顛覆等嘅重罪。再加上佢個政府喺處理非典型肺炎（沙士，SARS）嚟嗰陣聽信廣東省方面提供嘅假疫情，冇睇到問題嘅嚴重性，搞到有299人死咗，包括唔少醫護人員。香港人忍無可忍，終於響2003年7月1日發動咗1989年之後香港最大型嘅街頭遊行，有大約50萬嘅香港人著黑衫，要求董建華落台，同響2007年、2008年進行雙普選（行政長官、立法會）。
呢次遊行影響深遠。行政會議成員、自由黨嘅田北俊因遊行而轉軚反對立法，終於令23條草案無法通過。而負責23條立法嘅官員保安局">保安局局長葉劉淑儀，由民望第一跌到落包尾，受盡千夫所指，最後黯然落台。而董建華亦响第二屆任期未結束嘅情況下，喺2005年以健康（腳痛）為理由請辭，由當時嘅政務司司長曾蔭權先生接任。
喺全國政協十屆三次會議閉幕會上便，董建華畀人增選咗做政協第十屆全國委員會副主席。